
那洛巴大师教言集NARO28འོད་གསལ་གཏི་མུག་རྡོ་རྗེའི་ཤོག་རིལ།
1-4-44b

༄༅། །འོད་གསལ་གཏི་མུག་རྡོ་རྗེའི་ཤོག་རིལ།
༄༅། །འོད་གསལ་གཏི་མུག་རྡོ་རྗེའི་ཤོག་རིལ་བཞུགས་སོ། །ཨུ་རྒྱན་གྱི་གདམས་པ། མཁའ་འགྲོ་
མ་ཐམས་ཅད་ཀྱི་ཡང་སྙིང་། རྒྱུད་ཐམས་ཅད་ཀྱི་སྙིང་པོ་བསྡུས་པ། རིན་པོ་ཆེ་གསེར་ཞུན་དྲིལ་བ་ལྟ་བུའི་མན་ངག །དེ་ཡང་དཔལ་ན་རོ་པ་ཆེན་པོའི་བཞེད་ཀྱིས། འགྲོ་བ་གང་ཞིག་གཉིད་ལོག་
པ། །གཉིད་ལོག་སད་པར་མི་བྱེད་དོ། །བཟློག་པའི་བསྒོམ་པ་འདི་ཉིད་ཡིན། །སངས་རྒྱས་མུ་སྟེགས་པས་མི་ཤེས། །ཅེས་(ཞེས་)པའི་ལུང་ཡིད་ཆེས་ཀྱིས་ལེའུར་ཅེས་ཏེ། དེ་ལ་རྩ་རྡོ་རྗེ་ཐོད་སྦྱོར་
གྱི་མན་ངག །རླུང་རྡོ་རྗེ་ཐོད་སྦྱོར་གྱི་མན་ངག །ཐིག་ལེ་རྡོ་རྗེ་ཐོད་སྦྱོར་གྱི་མན་ངག་གོ། །ལུང་ལས་ཀྱང་། རྒྱལ་པོ་མཆོག་གསུམ་དེ་རབ་མཆོད། །མན་ཏྲ་ཨ་ས་ང་ལ་དྲིས། །དཀྱིལ་འཁོར་
རྒྱལ་མཆོག་ལྷ་རྒྱལ་མཆོག །སྔགས་ཀྱི་རྒྱལ་མཆོག་གསུམ་པ་ཡིན། །དང་པོ་དཀྱིལ་འཁོར་རྒྱལ་མཆོག་ནི། །མི་བསྐྱོད་བདེ་བར་གཤེགས་པ་ཡི། །ཕོ་བྲང་བཞུགས་པའི་དཀྱིལ་འཁོར་
1-4-45a

ཡིན། །མི་བསྐྱོད་པའི་ཐུགས་ཁ་རུ། །ཡི་གེ་ཧཱུཾ་གཅིག་གསལ་བར་བསྒོམ། །ཧཱུཾ་གི་ཐིག་ལེ་ན་ད་ལ། །དམིགས་པ་མི་རྟོག་ངང་ལ་བཞག །ཉིན་པར་ནམ་མཁའི་མཐོངས་
སུ་བསྒོམ། །མཚན་མོ་སྙིང་གི་དཀྱིལ་དུ་བསྒོམ། །ནམ་གུང་ཡོལ་ནས་ཐོ་རངས་བར། །ཐམས་ཅད་ཡོད་སྨྲའི་སྡེ་པ་སྟེ། །མི་བསྐྱོད་པའི་ཞིང་དུ་འདོད། །བླ་མ་མི་བསྐྱོད་ལྷ་ཚོགས་ལ། །སྲོད་ཀྱི་
བར་དུ་གསོལ་བ་གདབ། །སྲོད་ནས་ནམ་ནི་མ་ཕྱེད་བར། །གཉིད་མི་ལོག་ཞིང་(ཅིང་)སྐུ་ཁམས་གསེང་། །ནམ་ཕྱེད་དུས་ན་རང་ཉིད་ཀྱི། །སྙིང་ཁར་པདྨ་གསལ་བྱས་ལ། །མགོ་བོ་ཤར་ཕྱོགས་དག་དུ་(ཏུ་)
བསྟན། །ངེས་ནི་གཡས་པ་འོག་ཏུ་གཞུག །གཡོན་པ་ཐར་ལམ་སྙིང་ཁ་གཙོ། །མི་བསྐྱོད་འབྱོན་པའི་གནས་ཡིན་པས། །དུས་དེར་བསྒོམ་པ་མན་ངག་ཡིན། །ཐམས་ཅད་ཡོད་སྨྲའི་སྡེ་པ་སྟེ། །སྤྱི་
འདུན་གནས་བརྟན་བཞི་ཡིས་བྱེད། །དེ་དུས་རང་ཉིད་བསྒྲུབ་(སྒྲུབ་)པ་པོའི། །ཐེ་ཚོམ་སྤྲོས་པ་མ་ཆོད་ན། །གདམས་པ་ཆོས་དཔོན་ཉིད་ལ་ཞུས། །མདུན་མ་གནས་བརྟན་བཞི་ཡིས་བྱེད། །གཟའ་མི་
སུམ་བརྒྱ་ཉི་ཤུ་དང་། །སྟོང་ཚོ་གཅིག་ཏུ་འདོད་པ་དེ། །ཆོས་དཔོན་ཉིད་ལ་འདུས་ནས་སུ། །ཐར་ལམ་ཉམ་དུ་(ཉམས་སུ་)ལེན་པ་དང་། །ཆོས་རྣམས་སྤྲོས་དང་བྲལ་བ་ཡི། །སྣང་བའི་མཚན་མ་ཟད་གྱུར་
1-4-45b

ནས། །གནས་བརྟན་བཞི་ཡིས་ཆོས་འདུན་ལ། །ཆོས་མེད་འདུན་ལ་ཞིག་གྱུར་ནས། །ཚེ་འདི་ཉིད་ལ་སངས་རྒྱས་པའི། །[སངས་རྒྱས་ཚུལ། ན་རོ་པ་ཐར་ལམ་གྱི་ལུས་འདི་འོད་གསལ་དུ་ཐིམ་ནས་སངས་རྒྱས་
པར་འདོད། མི་ཏྲི་ངས། གསེར་འགྱུར་གྱི་རྩི་ལྟར་རམ། སྦྲུལ་ལྤགས་རྗེས་པ་ལྟར་སངས་རྒྱས་པར་འདོད།] འོད་གནས་སྐྱེ་མེད་འབྱུང་བའི་གནས། །ཐམས་ཅད་ཡོད་སྨྲའི་བྷེ་པ་ཤེས། །རྟོགས་པར་འདོད་ན་འདི་
བཞིན་བསྒོམ། །ཉིན་པར་ནམ་མཁའི་མཐོངས་ཉིད་དུ། །ཡི་གེ་ཧཱུཾ་སྔོན་རང་མདོག་ལྡན། །ཤིན་དུ་(ཏུ་)གསལ་བར་དམིགས་ནས་སུ། །དེ་ལས་འོད་ཟེར་ཁ་དོག་ལྔ། །འཇིག་རྟེན་ཁམས་སུ་འཕྲོས་པ་
ལས། །བརྟན་གཡོ་ཐམས་ཅད་འོད་དུ་ཞུ། །སླར་འདུས་ཧཱུཾ་ལ་ཐིམ་པ་ཡིས། །ཧཱུཾ་ཉིད་ཤིན་དུ་(ཏུ་)གསལ་བར་བསྒོམ། །མི་རྟོག་པ་ལ་བློ་བཞག་པས། །གནས་པར་འདོད་ན་དེ་ཉིད་བསྐྱང་། །གལ་ཏེ་
གནས་པར་མ་ནུས་ན། །འུ་ཡི་རང་བཞིན་དོན་གྲུབ་སྟེ། །ཡི་གེ་ཧ་ལ་ཐིམ་པར་བསམ། །སྣང་བ་མཐའ་ཡས་ཧ་དེ་ཉིད། །ཟླ་ཚེས་རིན་ཆེན་འབྱུང་ལྡན་ལ། །ཐིམ་ནས་ཟླ་ཚེས་ཐིག་ལེ་ལ། །ཐིམ་
པས་མི་བསྐྱོད་ཉིད་དུ་འདོད། །ཤིན་དུ་(ཏུ་)ཕྲ་བ་དེ་དབུས་ཉིད། །ན་ད་རྣམ་སྣང་མཛད་ཡིན་ཏེ། །ཕྱི་ནང་སྣོད་བཅུད་མ་ལུས་པ། །ཐིག་ལེར་དམིགས་ལ་མི་རྟོག་བསྒོམ། །ཉིན་མོའི་དུས་ནི་ཐམས་ཅད་
1-4-46a

དུ། །སྣ་ཚོགས་མཚན་མས་མ་གཡེངས་བར། །སྟོང་པ་ཉིད་ལ་གནས་ནུས་ན། །མི་རྟོག་ཡེ་ཤེས་སྐྱེ་བར་འགྱུར། །སྤྲོས་པ་ཅན་ནི་རྫོགས་རིམས་ཡིན། །ཤིན་དུ་(ཏུ་)སྤྲོས་
མེད་རྣལ་འབྱོར་པས། །སྣང་བ་སྣ་ཚོགས་གསལ་བ་ནི། །མེ་ལོང་ནང་གི་གཟུགས་བརྙན་དང་། །ཆུ་ཡི་ཟླ་བ་ཇི་བཞིན་དུ། །སྣང་བར་ཟད་མདོ་གྲུབ་པ་མེད། །ཆགས་སྡང་འཛིན་པས་མི་གོས་ཤིང་། །
ཚོགས་དྲུག་ཡུལ་གྱིས་མ་བཅིངས་པར། །རང་སྣང་འཛིན་མེད་ཉིད་དུ་གྲོལ། །ཉིན་མོ་བསྒོམ་པའི་ལམ་ཡིན་ཏེ། །ལམ་གྱི་འོད་གསལ་ཞེས་བྱའོ། །མཚན་མོ་གཉིད་ཀྱི་འོད་གསལ་ནི། །གོང་གི་
ལུས་གནད་དམིགས་པ་ལ། །མཆོག་ཏུ་ནན་ཏན་གཙོར་བྱས་ཏེ། །ལྷའི་རྒྱལ་མཆོག་མི་བསྐྱོད་པ། །སྔགས་ཀྱི་རྒྱལ་མཆོག་ཧཱུཾ་ཉིད་ཡིན། །དེ་ཡང་ཉལ་བའི་དུས་ཉིད་དུ། །སྙིང་གའི་ཧཱུཾ་ལས་
འོད་འཕྲོས་ནས། །རང་གི་ལུས་ངག་ཡིད་གསུམ་གྱི། །སྡིག་སྒྲིབ་མ་ལུས་དག་ནས་སུ། །བཤང་ལམ་གཉིས་ནས་དོན་པར་ཤམས(བསམ)། །གསང་སྔགས་རྒྱལ་པོ་ཧཱུཾ་ཉིད་ལ། །བསྙེན་པ་བརྒྱ་རྩ་
བརྒྱད་དུ་བྱ། །དེ་ནས་གཉིད་དུ་འགྲོ་བ་ན། །ཧཱུཾ་གི་ཐིག་ལེ་ན་ད་ལ། །དམིགས་ནས་མི་རྟོག་བསྒོམ་པ་ཡིན། །དྲུང་དུ་གྲོགས་པོ་གཅིག་བཞག་ལ། །གཉིད་དུ་ཡུན་རིངས་མི་བཏང་པར། །ཐུམས་
1-4-46b

སུ་བཅུག་པ་མན་ངག་ཡིན། །གྲོགས་པོས་བསླང་བའི་དུས་དེ་རུ། །འོད་གསལ་ཟིན་ནམ་མ་ཟིན་པ། །རང་གིས་རང་ལ་དྲི་བ་གཅེས། །ཟིན་ན་གཉིད་ཀྱི་རང་བཞིན་དེ། །བདེ་སྟོང་ཉིད་དུ་འཆར་བ་དང་། །
སད་པའི་དུས་དེར་རང་སེམས་དེ། །སྤྲོས་དང་བྲལ་བར་འཆར་བའོ། །དེས་ཀྱང་ཟིན་པར་མི་ནུས་ན། །བླ་མ་དཀོན་མཆོག་མཆོད་པ་དང་། །གྲོགས་པོ་རྟོགས་པའི་གདེང་ཡོད་ལ། །ཚོགས་
གསོག་ཤིན་དུ་(ཏུ་)རྒྱ་ཆེན་བྱ། །མཁའ་འགྲོ་རྣམས་ལ་གཏོར་ཚོགས་དང་། །ཡི་དམ་ལྷ་ལ་གཏོར་མ་གཅིག །མི་ཤ་ཨ་མྲི་ཏ་ཡིས་བརྒྱན། །གློ་གར་གཅིག་ཏུ་སྦས་བྱས་ལ། །འཚམས་(མཚམས་)ཀྱི་བར་
དུ་རྟ་རུ་བཟུང་། །ཨ་བ་འདུ་ཏིའི་ནང་ཉིད་དུ། །ནམ་མཁའི་འཐོངས་(མཐོངས་)ཉིད་གསལ་བར་བསྒོམ། །ཚངས་པའི་བུ་གའི་འོག་ཉིད་དུ། །ཐིག་ལེ་སྔོན་པོ་སྲན་མ་ཙམ། །དེ་ལ་དམིགས་ལ་གཉིད་
དུ་བཏང་། །འོད་གསལ་རྟོགས་པར་འགྱུར་བ་དང་། །རྒྱ་ལ་རྨི་ལམ་རྨིས་ན་ཡང་། །མཚན་མ་བཟང་པོ་འབྱུང་བ་དང་། །རང་སེམས་བདེ་བ་དང་བཅས་ཏེ། །སྐྱོན་གྱིས་གོས་པར་མི་འགྱུར་
རོ། །སངས་རྒྱས་ཆེ་བའི་ཡོན་ཏན་དང་། །བྱང་ཆུབ་སེམས་དཔའི་མཐོང་སྣང་འབྱུང་། །དེ་ལ་ངེས་ཤེས་སྐྱེས་པས་སུ། །འོད་གསལ་ཉིད་དུ་འཇུག་པར་འགྱུར། །ཟླ་ཕྱེད་བསྒོམ་པ་ཤིན་
1-4-47a

དུ་(ཏུ་)གཅེས། །དེས་ཀྱང་ཟིན་པར་མ་གྱུར་ན། །གསང་བ་སྨིན་འཚམས་(མཚམས་)བར་དེ་རུ། །ནམ་(རྣམ་)དཀར་གཅིག་ལ་དམིགས་པ་གཏད། །སྟོང་པ་འོད་གསལ་ཡིན་སྙམ་དུ། །དམིགས་
ལ་གཉིད་པར་བྱས་པས་ཟིན། །དྲན་པས་ཟིན་པ་ཤིན་དུ་(ཏུ་)གཅེས། །དེ་ལྟར་ཟླ་བ་ཕྱེད་དུ་བསྒོམ། །ཐ་མལ་གཉིད་ནི་སྤང་བར་བྱ། །དང་པོ་རྨི་ལམ་མེད་པའི་ཉམས། །གསལ་{-བ་-}རྟོག་པ་མེད་པར་
འབྱུང་། །དེ་ནི་ལམ་གྱི་འོད་གསལ་ལོ། །བརྟན་པ་ཐོབ་ནས་མངོན་གྱུར་ཏེ། །བདེ་གསལ་ཆོས་སྐུ་འབྱུང་བར་ངེས། །གཉིད་དང་མ་གཉིད་ཁྱད་མེད་དོ། །གཉིས་སྣང་བག་ཆགས་ཟད་པར་
འགྱུར། །སྔོན་བྱུང་ཐུབ་པ་ཆེན་པོ་ཡིས། །ཚོགས་གཉིས་སྔོན་དུ་སོང་བ་ལས། །འོད་གསལ་རྒྱུད་ལ་སྐྱེ་བར་འགྱུར། །ཏིང་ངེ་འཛིན་ལ་ཆགས་པ་ཡིས། །འོད་གསལ་རྒྱུད་ལ་མ་སྐྱེས་པས། །ཕྱོགས་
བཅུའི་སངས་རྒྱས་ཀུན་འདུས་ནས། །དུས་དེ་ཉིད་དུ་དབང་བསྐུར་ཏེ། །དེ་དག་ཐམས་ཅད་མགྲིན་གཅིག་ཏུ། །འོད་གསལ་ངང་ལ་གནས་གྱིས་དང་། །འོད་གསལ་ངང་ལ་གནས་བྱས་ན། །རབ་
དགའི་གཟུགས་སུ་བསྟན་པར་འགྱུར། །ཞེས་པའི་གསུང་ནི་བྱུང་བ་ལས། །བརྟེན་ནས་བྱང་ཆུབ་ཤིང་དྲུང་དུ། །རྩ་ཆག་གང་ལ་བཞུགས་གདན་བྱས། །རྡོ་རྗེ་དཀྱིལ་དཀྲུངས་མ་བཤིག་པར། །
1-4-47b

འོད་གསལ་བ་ལ་གནས་བྱ་སྙམ། །བདུན་པ་སྔོན་དུ་སོང་བ་དང་། །ཏིང་ངེ་འཛིན་ལ་ཞེན་པ་ཐོངས། །ཚོགས་གཉིས་སྔོན་དུ་སོང་བ་ལས། །སྲོད་ལ་བདུད་ཀྱི་ཚོགས་བརྟུལ་(བཏུལ་)ནས། །ཐོ་རངས་འོད་གསལ་
མཚས་{མཚམས་}མེད་ཐོབ། །ཐུབ་མཆོག་དམ་པ་དཔའ་ཆེན་པོས། །སྐྱེས་བུ་ཀུན་གྱི་ཁ་ལོ་བསྒྱུར། །རྫོགས་སངས་རྒྱས་ཀྱི་མཚན་ཉིད་ནི། །འོད་གསལ་ཆེན་པོ་ཐོབ་ལས་བྱུང་། །དོན་གཉིས་འགྲུབ་པའི་
འབྲས་བུ་ཡིན། །བསྟན་པ་འདི་ཉིད་ཡོངས་བཟུངས་ཏེ། །བསྟན་པ་ལས་བྱུང་ཕྲིན་ལས་འདི། །འོད་གསལ་ཆེན་པོའི་མན་ངག་ཡིན། །གཉིད་ཀྱི་འོད་གསལ་མི་བརྟན་ཞིང་། །བར་འཚམས་(མཚམས་)མེད་
པར་མ་འབྱོངས་ན། །བརྟན་པ་ཐོབ་པར་འདོད་པ་ཡིས། །ཉིན་པར་ཕྱིའི་ནམ་མཁའ་ལ། །དམིགས་ལ་ཕྱག་རྒྱ་ཆེན་པོར་བསྒོམ། །བསྐྱེད་རིམས་བཟླས་པ་ལ་སོགས་དང་། །འདུས་བྱས་
མཚན་མའི་ཆོས་སྤྱོད་ཀུན། །སྐད་ཅིག་ཙམ་ཡང་དྲན་མི་བྱ། །ཕྱི་དང་ནང་གི་བྱ་བ་དང་། །དགེ་དང་མི་དགེའི་ལས་རྣམས་ལ། །འཇུག་པར་འགྱུར་བ་ལྟ་ཅི་སྨོས། །ཉིན་མཚན་གཉིས་པོ་གང་དང་
གང་། །འགྲོ་འདུག་བསྐོར་བ་ལ་སོགས་པ། །ལུས་ངག་ཡིད་གསུམ་ཆོས་སྤྱོད་ཀུན། །སྐད་ཅིག་ཡུད་ཅིག་དྲན་ན་ཡང་། །དམ་ཚིག་ཉམས་པར་འགྱུར་བ་ཡིན། །མི་མནོ་མི་སེམས་མི་བསམ་
1-4-48a

པར། །མི་བསྒོམ་མི་དཔྱད་རང་སེམས་ཉིད། །མཉམ་པ་ཉིད་དུ་བཞག་ནས་སུ། །ལྷན་ཅིག་སྐྱེས་པའི་ཡེ་ཤེས་དེ། །སྤྲོས་བྲལ་ཉིད་དུ་བརྐྱང་པ་གཅེས། །མིག་ནི་ནམ་
མཁའི་དབུས་སུ་བལྟོས། །ཉིན་པར་བསྒོམ་པའི་མན་ངག་ཡིན། །མཚན་མོ་གཉིད་ཀྱི་འོད་གསལ་དེ། །རྟགས་པར་རྒྱུན་དུ་གནས་འདོད་ན། །དམིགས་པ་དུ་མ་མི་སྤོ་བར། །ཨ་བ་འདུ་ཏིའི་ནང་
ཉིད་དུ། །ནམ་མཁའ་སྔོ་སྐྱ་སྤྲིན་བྲལ་མདོག །མཚན་མ་དང་བྲལ་སྐྱེ་མེད་གནས། །ཆོས་ཉིད་མཚོན་རྩ་དེ་ཉིད་ལ། །ཤེས་པ་ལྡན་གྱིས་གཏད་ལ་ཉལ། །ཡིན་(ཉིན་)ནི་འདུ་ཏིའི་ནང་དུ་བལྟོས། །མཚན་མོ་
བསྒོམ་པའི་མན་ངག་ཡིན། །གང་ཡང་ཡིད་ལ་མ་བྱས་ཤིང་། །འོད་གསལ་ཡིད་ལ་མ་བྱས་ན། །ཉིན་མཚན་གཉིས་ཀྱི་འཁྲུལ་པ་མེད། །སྐྱེ་མེད་སྤྲོས་དང་བྲལ་བར་འཆར། །རང་ཉིད་མཚམས་ནི་
དམ་པར་བཅད། །གཡོག་པོ་ཅིག་གིས་འཐུན་རྐྱེན་བསྒྲུབ། །སྲོད་ལ་གཡོག་པོ་གཉིད་ལ་བཏང་། །ཐོ་རངས་རང་ཉིད་ཉལ་བར་བྱ། །གཡོག་པོ་བསླངས་ལ་རྩ་རུ་བཞག །སྐད་ནི་མི་ཆེ་མི་ཆུང་བར། །
ཆོས་རྣམས་ཐམས་ཅད་འོད་གསལ་གྱི། །རང་བཞིན་ཡིན་ཞེས་ཟེར་དུ་བཞུག །མི་གཅིག་ཟན་ཟའི་བར་ཉིད་དུ། །གཉིད་དུ་བཏང་ལ་གྲོགས་པོས་བསླང་། །དཔལ་ན་རོ་པའི་བཞེད་ཀྱི་ཡིས། །
1-4-48b

གཉིད་དང་རྨི་ལམ་བར་ཤེད་ན། །གཏི་མུག་འོད་གསལ་ངོ་བོ་ཅན། །རྗེས་ལ་འོད་གསལ་རྒྱ་ཡིས་ཐེབས། །སྐྱེ་མེད་ཆོས་སྐུའི་ངོ་བོ་ཅན། །མིང་ཡང་འོད་གསལ་གདམས་ངག་ཟེར། །འཁྲུལ་
པ་ལམ་སློང་ངོ་མཚར་ཆེ། །སློབ་དཔོན་ཆེན་པོ་ཟླ་བ་པས། །ལོ་ནི་བཅུ་གཉིས་བར་དུ་ནི། །འོད་གསལ་བ་ལ་གཉིད་ལོག་པས། །ཕྱག་རྒྱ་ཆེན་པོའི་དངོས་གྲུབ་ཐོབ། །དེ་ན་གསང་སྔགས་ཐབས་
ལམ་ཆེ། །ལམ་གྱི་འོད་གསལ་གོམས་བྱས་ནས། །གཉིད་ཀྱི་འོད་གསལ་འཚམས་(མཚམས་)མེད་ན། །བར་དོ་དང་པོའི་འོད་གསལ་ལ། །བརྟན་པ་ཐོབ་པ་ཆོས་ཉིད་ཡིན། །དབེན་པའི་གནས་དང་
འཐུན་པའི་གྲོགས། །ཁ་ཟས་སྤྱོད་ལམ་འཐུན་རྐྱེན་སོགས། །བསྒྲུབ་རྫས་མ་ཚང་མེད་པ་དང་། །ཤིན་ཏུ་གུས་པའི་ཡིད་ཀྱིས་སུ། །གསང་ནས་བསྒྲུབ་པ་མན་ངག་ཡིན། །སྙན་རྒྱུད་ལག་
ལེན་ཡི་གེ་རིས། །དཀྱུས་སུ་བཀོད་པར་མི་རིགས་ཀྱང་། །སྙིང་དང་འདྲ་བའི་སྲས་པོ་ལ། །མིག་དང་འདྲ་བའི་མན་ངག་སྦྱིན། །འགྲོ་ལ་ཕན་དང་གནས་བྱའི་ཕྱིར། །སྐུ་གསུམ་ཐོབ་པའི་མན་ངག་
ཡིན། །རྩོད་གཞིའི་དུས་ཀྱི་སྙིང་(སྙིགས་)མ་ལ། །ལྔ་བརྒྱ་ཐ་མར་བསྙེན་དུས་འདིར། །ལོག་ཆོས་མུ་སྟེགས་དར་བ་དང་། །ནང་པའི་བསྟན་པ་ཉམས་པ་ཡིས། །མི་ནད་འཁྲུག་པ་མུ་གེ་དང་། །དུས་
1-4-49a

མིན་འཆི་བ་སྣ་ཚོགས་འབྱུང་། །ཚེ་དང་ལོངས་སྤྱོད་དར་རྒུད་ཆེ། །དབང་མ་བསྐུར་དང་ལུང་མ་ཐོབ། །སྔོན་གྱི་ལས་འཕྲོ་མེད་པའི་མིས། །གནར་མེད་ལས་ལ་འཇུག་ཉེན་ཆེ། །
ཤིན་དུ་(ཏུ་)དམ་པར་སྦས་ནས་སུ། །ཉམས་ལེན་ཟབ་མོ་གསོངས་ལ་གྱིས། །བླ་མ་རྣམས་ཀྱི་བཀའ་རྒྱ་དང་། །མཁའ་འགྲོ་[སེང་གེ་གདོང་ཅན་མ་དང་། དུད་སོལ་མ་དང་། དུང་སྐྱེས་མ་དང་། མུན་པའི་མདོག་
ཅན་མ་ལ་སོགས་པའི་ཡེ་ཤེས་ཀྱི།] རྣམས་ཀྱིས་སྙན་རྒྱ་ཡོད། །ཟབ་མོ་གདམས་པའི་ཟབ་རྒྱ་གསུམ། །རྒྱ་གསུམ་བཏབ་པའི་མན་ངག་ཡིན། །ས་མ་ཡ་ཏ་པ་ཏ། ཨྠིྀ།། །།


目录
འོད་གསལ་གཏི་མུག་རྡོ་རྗེའི་ཤོག་རིལ།